• Абдумудассир АҲМАДОВ
  • 26.12.2018
  • 1

Каримҷон «муҳоҷири сол» шуд

Созмонҳои ҷамъиятии Тоҷикистон ҷоизаи «Муҳоҷири сол”-ро ба Каримҷон Ёров, як ҳомии ҳуқуқи муҳоҷирони тоҷик дар Маскав супурданд.

Валентина Чупик ҷоизаи «Беҳтарин намояндаи созмонҳои ғайридавлатӣ дар роҳи ҳимояи ҳуқуқи муҳоҷирон”-ро ба даст овард. Бисёриҳо, бахусус мардуми муҳоҷир Каримҷон Ёров ва Валентина Чупикро ба далели мубориза хастагинопазиронаш барои дифоъ аз ҳаққи муҳоҷирон дар Русия номзадҳои арзанда меноманд.

Маркази ҳуқуқи башари Тоҷикистон, Институти ҷомиаи боз – Сандуқи рушди Тоҷикистон, намояндагии Агентии муҳоҷирати СММ ва Барномаи рушди СММ дар Тоҷикистон – ҷоизаи «Муҳоҷири сол”-ро ба Каримҷон Ёров, як ҳомии ҳуқуқи муҳоҷирони тоҷик дар Маскав доданд. Ҳамин тавр, ҷоизаҳои «Беҳтарин намояндаи созмонҳои ғайридавлатӣ дар роҳи ҳимояи ҳуқуқи муҳоҷирон” насиби Валентина Чупик аз созмони «Тонг жаҳони” (Маскав) ва Андрей Якимов аз «ПСП Фонд”-и шаҳри Санкт-Петербург гардид.

Дар муаррифии Каримҷон Ёров ҳамчун барандаи ҷоизаи «Муҳоҷири сол” таъсисдиҳандагони ин ҷоиза чунин мегӯянд: «Ӯ бо қонуншиканиҳо дар саффи мақомоти ҳифзи ҳуқуқ ва корфармоёни бевиҷдон нисбат ба муҳоҷирони корӣ мубориза мебарад. Ва ин корро комилан ройгон анҷом медиҳад. Ӯ маъмури гуруҳи Мы, мигранты дар шабакаи Фейсбук буда, ба таври фаъолона ба ҳар савол, дархости кумак ваё дархости машварат дар масоили муҳоҷират расидагӣ мекунад. Каримҷон тарафдори будубоши қонунии муҳоҷирон дар Русия аст, вале дар айни замон муносибати муғризона ва таҳаммулнопазири мақомот нисбат ба муҳоҷиронро маҳкум мекунад. Ҳамкорони Каримҷон аз ӯ ба унвони як фаъоли пуртаҷрибаи ҷасур, босавод ва боирода ва дорои иртибототи муфид дар Маскав тавсиф мекунанд. Журналистон, ҳуқуқдонҳо, блогнависон ва муҳоҷирони корӣ аз ӯ пуштибонӣ мекунанд ва ӯ ба навбати худ аз ҳамватанҳояш дифоъ мекунад.”

Бисёриҳо, бавижа муҳоҷирон Каримҷон Ёров ва Валентина Чупикро номзадҳои арзанда барои дарёфти ҷоизаҳои «Муҳоҷири сол” меноманд ва мегӯянд, чунин қадрдонӣ ин ҳомиёни ҳуқуқро барои дифоъ аз ҳуқуқи муҳоҷирон боз ҳам бештар руҳбаланд мекунад.

Каримҷон Ёров зодаи водии Рашти Тоҷикистон ва роҳбари созмони «ЭтМос” мебошад. Ӯ тақрибан 20 сол боз дар Маскав ба ҳимоят аз ҳуқуқи муҳоҷирон машғул аст.

Соли гузашта ӯ ба далели ин фаъолиятҳояш ҳатто маҷбур шуд, ки як муддат тарки Русия кунад, чунки ӯро ҳам мехостанд мисли Каромат Шарипов аз ин кишвар берун андозанд. Вале баъди бозгашташ ба Маскав Каримҷон Ёров бо ҳамон ҷасорати пешин ба арсаи ҳимоят аз ҳуқуқи муҳоҷирон баргашт.

Бисёриҳо Каримҷон Ёровро барои баҳсҳои нотарсонааш бо афсарони пулиси Русия хуб дар ёд доранд. Ӯ ҷасурона баҳсҳояш бо кормандони пулисро ба навор мегирад ва дар Интернет мегузорад.

Ҷоизаи «Муҳоҷири сол” бештар як ҷоизаи рамзист ва маблағаш ҳамагӣ 2 ҳазор сомониро ташкил медиҳад.

Поделиться новостью с друзьями:


1 комментарий

  • ТОХИР:

    Дар инчо гап сари як чоизаи ночиз нест.Гап сари он,ки хама вакт ба як занги телефони дар чои ходиса хозир мешавад ва хамаи камбудихое,ки ба сари мухочирони точик меояд хамаашро хал мекунад ройгон.
    Ягона шахсе хаст барои мардуми гариби мо дар ФР.
    Ман шахсан шохиди он будам,ки мухочирони точикро кормандони полицияи Москва 17-нафаро дар назди хавлии милисахона катор карда дар таги барф сару луч пойлуч азоб медоданд холо он,ки хамаашон хуччат доштанд,сафоратхона занг мезананд гушакро мебардоранду инаш бори вай меандозанду дигараш бори каси дигараш….хулоса ягон кас ба кумакашон наомад боз хамин «КАРИМЧОН ЁРОВ»Сафоратхонаи моро дар Россия факат барои пулкоркуни пулкани аз мухочирон ва барои справкаи «Возвращения на родина»фурухтанда монию халос.

Leave a Reply

Ваш e-mail не будет опубликован.