Таҳмина Раҷабова: Ман духтари Убайдулло Раҷаб нестам (12 акс)

Рози ситораҳо, ТОҶИКИСТОН, ФАРҲАНГ ВА АДАБ, ХАБАРИ ТОЗА

Таҳмина Раҷабова, бонуест, ки ҳам дар соҳаи кино, ҳам дар роҳи рӯзноманигорӣ муваффақ гаштааст.  Тибқи хоҳиш ва дархости хонандагони паблик-чати “Оила” суҳбати онлайнӣ сурат гирифт ва онро пешкаши шумо менамоем.  

Савол: Салом, бонуи зебо! Ҳар вақте шуморо дар рӯи саҳна мебинам, беихтиёр дар чашмонам ашк пайдо мешавад. Шояд ашки самимият нисбати ҳунари шумо бошад. Мехостам фаҳмам, ки Шумо аз хурдӣ орзуи  ҳунарманд шуданро  дар дил мепарваридед ё баъдан пайдо шуд?

Бобоҷони Саид, аз н. Темурмалик.

Посух: Воалайкум бар салом Бобоҷон ! Ҳарчанд барои ҳунарманд шудан орзу ва хаёлҳои рангин надоштам, вале аз хурдӣ истеъдод доштам. Ҳамагӣ тавсия мекарданд, ки бояд ҳунарманд бошам.

Савол: Таҳмина, раваду коргардонҳо шуморо ба офаридани нақш дар филми мазҳакавӣ даъват намоянд, қабул мекардед ё рад? Мустафои Раҷабзод, н. Панҷ.

Посух: Бародари азиз, Мустафо! Бояд қайд намоям, тамоми нақшҳое, ки офаридаам, қариб ҳамагӣ инъикоскунандаи воқеаву фоҷеа мебошад. Вақти он расидааст, ки ба мазҳака рӯ биёрам.

Савол: Ростӣ, аз саволам шарм медорам, вале пас аз шунидани ин хабар хеле ғамгин гаштаам. Рост аст, ки аз шавҳаратон ҷудо шудед?

Ҳадиса, аз Бохтар

Посух: Ҳадисаҷон ! Ба чунин гапҳои беасос бовар накунеду ғамгин нашавед. Ин гапҳо туҳмате беш нест. Ман бо шавҳарам зиндагӣ дорам.

Савол: Хоҳишмандам дар бораи вазъи оилавиатон каме маълумот медодед. Чанд фарзанд дореду онҳо чандсолаанд ва  чӣ ном доранд?

Маҳина, н. Шаҳринав.

Посух: Маҳинаҷон! Ман шавҳар дорам. Ду фарзанд, бо номи Ҷовидон, ки 16 сол дорад, дуюмӣ бошад Шодмон 12- сола аст.

Савол: Мехостам донам, ки дар оилаатон барои нақшофариатон касе зиддият нишон намедиҳад?

Бону, аз Дарвоз.

Посух: Ташаккур, Бону! Бале, зиддияти асосиро шавҳарам нишон дода меистад, ки баъзан душвориро пешорӯям мегузорад. Ба хотире, ки ӯ маро дӯст медорад, ҳамаашро қабул мекунад. Ҳамин аст, ки ман Таҳминаам !

Савол: Шумо ишқро дар чӣ эҳсос мекунед? Лутфан ҷавоби саҳеҳ диҳед ва қаблан сипос!

Таҳмина, ш. Ваҳдат.

Посух: Ҳамноми азиз! Ишқ танҳо 3 чизро мепарастад. 1.Ҳамдигарфаҳмӣ. 2. Боварӣ, 3. Ростқавлӣ. Чуноне, ки Пайғамбари мо (салалоҳу алайҳи вассалам) гуфтаанд: Бо ишқ ҳила макун, ки мегурезад.

Савол: Таҳмина- апа!  Як саволамро ҳамеша ҷавоб мекобам, ки ба санъати шумо дахл дорад.  Ин ҳам то охир нақш набозидан дар филми “Бедил” –и Талабшо Муқимов аст. Баъзеҳо мегӯянд, ки шартномаи байни онҳо рост наомад. Хулоса, дар ин маврид, суханҳо  зиёд аст, вале акнун фурсат расид, худатон росташро гӯед.

Фараҳбахш, н. Рӯдакӣ.

Посух: Хоҳари азиз! Хеле саволи бамаврид ва шояд бисёр нафароне буданд, ки ба ин савол ҷавоб меҷустанд. Дар вақти омӯхтани  сенария маълум шуд, ки филм бисёр ҷойҳое дошт, ки ба ман дуруст намеомад. Аз ҳамин сабаб рад кардам. Лекин гуфтанӣ ҳастам, ки филми хуб баромад.  Барои офарандагонашон пешравӣ хоҳонам.

Савол: Оё рост аст, ки шумо бо шавҳаратон дӯст дошта хонадор шудед?

Ёқубҷони  мухлис

Посух: Бале, дӯстдошта гирифтам. Баъзан монанди шеру паланг меҷангем, лекин ишқ, ки самимӣ аст, пойдор аст ва ғолиб мебарояд.

Савол: Апаи азиз! Дар ду ҷода фаъолият кардан, ба ғайри ин боз зиндагии оилавиатон душвориро  пеш намеорад?

Рухшона, н. Вахш. 

Рухшонаҷон ! Меорад. Лекин зан бояд тавоною босабр бошад. Душворию мушкилиҳо буданд,  ҳоло хеле сабук шудааст ва мисли “СОЛДАТ”-ҳо шудам.

Савол: Шумо дар чанд филм нақши асосӣ бозидаед?

Фаридун, аз ш. Душанбе.

Посух: Дар 23 филми тоҷикӣ, 2 филми хориҷӣ, ҳамчунин, дар 18 филм нақши асосӣ бозидаам.

Савол: Апаҷон, шавҳаратон барои пӯшидани либосҳои нимурён зид намебароянд?

Фарзона, ш. Бохтар.

Посух: Фарзонаҷон! Албатта зид мебарояд, лекин ман  либосҳои аврупоӣ мепӯшаму  нимурёнро худам ҳам дӯст намедорам.

Савол: Рост аст, ки шумо духтари ҳунарпешаи машҳури тоҷик Убайдулло Раҷабов ҳастед?

Акобирҷон Шарифов

Посух: Бародари азиз! Не, ин гап асоси воқеӣ надорад. Устодро бисёр ҳурмат  мекунаму ҳунарашонро дӯст медорам.

Савол: Апаи Таҳмина, мо мухлисони ашадиатон мехоҳем донем, ки шавҳаратон чӣ кор мекунанд. Оё фаҳмиданаш имкон дорад?

Анзурат, н. Вахш

Посух: Ҳамин қадар гуфта метавонам, ки шавҳарам хизматчии давлатӣ аст. Аз ин бештар маълумот дода наметавонам.

Савол: Шумо дар як филме бо номи 12-соли интизорӣ нақш офаридаед. Фаҳмидан мехостам, ки филм кай ба фурӯш мебарояд? Ҳангоми нақшофарӣ дар ин филм худро чӣ гуна тасаввур намудед?

Амирҷон, н. Ҳамадонӣ.

Посух: Амирҷон ба саъми шумо ва дигар мухлисонам мерасонам, ки  фиттаи филми 12 соли интизорӣ то охири ҳамин сол ба фурӯш мебарояд. Воқеан ҳам душвор буд, лекин  роҳи интихобкардаи худам аст ва бояд бардошт кунам.

Савол: Бонуи чеҳрамаҳтоб Таҳминаро дар як филми истеҳсоли Афғонистон дида хушҳол шудам, чунки дар филм нақши зани ситамдидаро чунон табиӣ бозида аст, ки кас гумон мекунад, ки  филм на аз рӯйи сужа, балки воқеӣ сурат гирифта истода бошад. Чӣ гуна бароятон муяссар гашт офаридани нақши сангин?

Гулбаҳор, н. Спитамен.

Посух: Душвор буд. Филм аз қиссаи занҳои афғон буд. Аксари лаҳзаҳои филм аз дидани манзараи  ҳаёти онҳо худ ба худ пайдо мегашт ва ончунон дода шудам, ки ҳатто бовар намекардам, ки ман нақш офарида истодаам.

Савол: Дар кадом давлатҳои ҷаҳон сафари ҳунарӣ доштед?    

Фарангис, ш.Бохтар.

Посух: Ба бисёр давлатҳои хориҷа, аз ҷумла, ба шаҳрҳои  Туркия, Дубай, Москва, Ҳиндустон барои баланд бардоштани савияи касб рафта будам.

Савол: Таҳмина, орзуи журналист шуданро доштед ё хоҳиши волидон буд ва муддати чанд сол аст, ки дар телевизион  кор мекунед?

Мирзонаими Фархорӣ.

Посух: Журналистӣ ба фикри ман ҳеч гоҷ маҷбурӣ шуда наметавонад. Барои он ки дар ин соҳа эҷодкорӣ дар мадди аввал меистад. Касбе нест, ки таваккалан интихоб намоед.  Дар телевизион муддати  12 сол аст, ки фаъолият дорам.

Савол: Таҳмина, айни ҳол муносибати шумо бо Талабшоҳ Муқимов чӣ гуна аст?

Фарзонаи Файз.

Посух: Салом Фарзона. Шодам аз саволат. Шукри Худо муносибати ману Талабшо хуб аст. Мо дӯст будем ва мемонем.  Аз фурсат истифода бурда, бароят пешравӣ ва муваффақиятро  дар касбу корат таманно мекунам.

Савол: Сири зебогиятон дар чист? Шояд аз ягон ниқоб истифода мебаред?

Наргис, ш. Бохтар.

Посух: Сири зебогиям дар дуруст хӯрдани ғизо аст. Нӯшидани об низ барои зебо мондани симои ҳам зоҳирӣ ва ҳам ботинӣ мусоидат мекунад.

Савол: Шуморо дар тӯйҳо барандагӣ мекунед? Чӣ қадар маблағ  талаб карданатонро мегуфтед.

Темур, аз н. Ёвон.

Посух: Салом Темур! Намедонам мутаассифона гӯям ё хушбахтона, лекин дар тӯйҳо барандагӣ намекунам. Шояд аз набудани вақт бошад, ҳамеша дар ТВ, дар филмҳо ва оила банд ҳастам.

Савол: Дар филми “Паймон,” нақши занеро бозидаед, ки ба роҳи пулу моли  дунё чашмаш  кӯр гашта буду ба шавҳараш хиёнат мекунад. Офаридани ин нақш чӣ таъсир гузошт?

Шаҳоб, н. Тоҷикобод.

Посух: Албатта, нороҳат гаштам. Хеле вақт таъсири филм дар вуҷуди ман монд. Ҳатто  то ҳол ҳамон филмро бинам, дилам хиҷил мешавад. Мақсади асосии нақш офаридан, аз уҳдаи иҷрои нақш баромадан аст ва баъди  бозидани  ин нақш баҳои баланд гирифтам.

Савол: Инсон метавонад, бе кӯмаки касе муваффақ шавад?

Сармад, ш. Душанбе.

Посух: Не наметавонад. Касе мегӯяд, ки танҳо бо кӯшиши худам муваффақ шудам, дурӯғ аст. Ҳама вақт Худованд касеро сабаб мегардонад, то ки бандаи дигараш пешрав шавад.

Савол: Таҳмина рашк дорад?  Ба андешаи Шумо, оё рашк воқеан ҳам  нишони муҳаббат аст?

Сармад, ш. Душанбе.

Посух:  Ба фикри ман ишқ бо рашк зеб дорад. Лекин рашки солим бошад. Рашке, ки созанда бошад. Ман зидди рашки беасос ҳастам.

Савол: Сокини ноҳияи дурдаст ҳастам ва зиёд мехоҳам Шуморо ҳамчун меҳмон даъват кунам. Лекин намедонам, ки  меоед ё не. Шояд назаратон  моро нагирад. Барои ҳамин мехостам пурсам, ки агар имкон  дошта бошед, ҳамчун меҳмон даъвататон намоям.

Посухатонро Шаҳбол интизор аст.

Посух: Шаҳбол, додари азиз! Аз даъвататон шодам. Ман низ мисли шумо бандаи Худоям. Чуноне, ки мегӯянд, назари Худо дар пастист. Ва ман  дигар хел буда наметавонам. Аз сабаби он ки корам зиёд асту графики холӣ надорам, наметавонам сари вақт ба кори дигар даст занам.

Савол: Таҳминабону. Агар  рӯзе дар оила пешатон гузоранд, ки ё кор мекунед ё оиларо интихоб кунед. Интихоби шумо?

Сармад, ш. Душанбе.

Посух: Ман аллакай дар назди ин хел интихоб мондам ва бо розигии Худованд тавонистам, ки ҳардуяшро аз даст надиҳам. Агар боз ҳамин хел шавад, боз ҳам бурд хоҳам кард Иншоаллоҳ !

Савол: Нафарони зиёд мехоҳанд бо шумо вохӯрӣ намуда, аксҳои хотиравӣ гиранд. Кай муштоқони симои ҷаззобатонро ба вохӯрӣ даъват месозед, то аз наздик  шуморо дида, хумори дил бишкананд.

Шарифамоҳи Баҳодур, н.Панҷ.

Посух: Як рӯзи Иллоҳиро интихоб карда, дар назди бинои Шарқи озод ё ҳафтаномаи “Оила” ҷамъ шавем, суҳбат намоему акс гирем. Тайёрам  4 соати худро барои шумо мухлисони азиз ҷудо менамоям.

Охир сухани Таҳмина баҳри мухлисонаш, ки баъди се соат суҳбати онлайнӣ доштанд, чунин аст:

Мухлисони ҷонони ман ! Ман бо шумо зиндаам. Ҳозир аз чашмонам ашк баромада истодааст, чунки ба ман як умеди тоза бахшидед. Ман боз қавитар гаштам. Дӯстатон медорам ва муваффақияти ман  аз дастгирии  шумо вобастагии зиёд дорад ва иқрор мешавам, ки  бо шумо зиндаам.

Омодасоз М. Давлат

 

 


Поделиться новостью в социальных сетях:

2 комментарий

  • Тавба гуе ман хамрохи ин алломаи айем сурат гирифтани будаам…. Дуруг хам ба эбаш….

  • Тахминабону шумо дар хакикат зебо хастед. Мехохам шуморо аз наздик бубинам.

Leave a Reply