Рӯзнома зиёд, "Тоҷикистон" яктост!

Эмомалӣ Раҳмон Мирзиёевро ба Тоҷикистон даъват кард

Президенти Тоҷикистон аз Президенти Ӯзбекистон даъват кард, ки дар вақти барояш мувофиқ зимни як сафари расмӣ ба Тоҷикистон ташриф орад. Ин даъват ба хушнудӣ пазируфта шуд.

Ин нукта дар ҷараёни дидори Эмомалӣ Раҳмон бо Шавкат Мирзиёев, Президенти Ӯзбекистон, ки 28 ноябр дар ҳошияи Вохӯрии дуюми машваратии сарони давлатҳои Осиёи Марказӣ дар шаҳри Тошканд сурат гирифт, таъкид гардид.

Президенти Ҷумҳурии Тоҷикистон пас аз ширкат дар иҷлоси навбатии Шӯрои амнияти дастаҷамъии Созмони Аҳдномаи амнияти дастаҷамъӣ дар шаҳри Бишкек  ба Тошканд омад.

Дар ҷараёни мулоқот маҷмӯи васеи масоили ҳамкории ду кишвар,  назири масоили тиҷорату иқтисод, нақлиёт, фарҳангию гуманитарӣ ва маориф мавриди муҳокима қарор гирифт.

Сафари нахустини Шавкат Мирзиёев, Президенти Ӯзбекистон ба Тоҷикистон  рӯзи 9-уми марти соли 2018 анҷом шуда буд. Дар ҷараёни сафари, ба қавли мақомот, таърихии Мирзиёев ба Душанбе 27 санаду созишнома имзо гардид, ки аз ҷумла ба шаҳрвандони ду кишвар ҳақ дод, бидуни виза то сӣ рӯз ба қаламрави якдигар равуо кунанд.

Моҳи августи соли 2018 Эмомалӣ Раҳмон бо як сафари давлатӣ  вориди Тошканд  шуд.  Дар ҷараёни ин сафар санадҳое имзо шуданд, ки муносибатҳои дуҷонибаро комилан нав карда ва  дар ҳама самтҳо ҳамкориҳоро ба роҳ монданд.

Ҳамчунин, дар шаҳри Тошканд созишномаи шарикии стратегӣ бо Ӯзбекистон имзо шуда ва  аз ҷониби порлумони Тоҷикистон тасвиб гардид. Тоҷикистон бо Русияву Чин ва Қазоқистон низ шарики стратегист.

Зимнан, дар замони сард будани робитаҳо, Тоҷикистон бо Ӯзбекистон камтарин робитаҳои иқтисодиро дошт. Дар соли 2015 ҳаҷми гардиши мол миёни ду кишвар ҳамагӣ 12 миллион доллар буд. Дар соли 2017 додугирифти маҳсулот миёни Тоҷикистону Ӯзбекистон ба беш аз 240 миллион доллар расид. Дар соли 2018 гардиши молҳо миёни ин ду кишвар нисбат ба соли 2017 беш аз 50 дарсад афзоиш ёфт.

Шарҳ

Аввалин шуда шарҳи худро гузоред!

Ваш e-mail не будет опубликован.